كلنا أكيد سمعنا عن حاجة أسمها التغير المناخي، وللي ما يعرفش، هو ببساطة شديدة "تغيير" في كل حاجة بنشوفها وبنشربها وبناكلها وبنعيشها في حياتنا. ولسوء الحظ، وده ممكن يكون مفاجأة لمعظم الناس، إنه قد أثبت علميًا إن الإنسان هو أحد أهم الأسباب الرئيسية اللي أدت لهذه الظاهرة العالمية الخطيرة وده بسبب العادات غير البيئية اللي بيمارسها. بس، لسه في إمكانا نصلح ونغير العادات دي بعادات بيئية هتساعدنا إن إحنا نحافظ على كوكبنا.
ومن العادات البيئية البسيطة اللي ممكن نطبقها في حياتنا اليومية لمواجهة التغير المناخي:
1- استخدم ثلاجة عالية الكفاءة ودي بتستهلك طاقة أقل.
2- الأكل الطازة والعضوي لأنه بيدعم الاقتصاد المحلي وبيقلل من استهلاك الطاقة، ده غير إنه كمان بيقلل من انبعاثات غازات الصوبات الزراعية.
3- ممكن تستخدم العجلة كوسيلة موصلات وممكن تروح الشغل بموصلات عادية بدل ما تروح بعربيتك أو ممكن كمان تضبط مع صحابك اللي عندهم عربيات إن كل يوم واحد ياخد الباقي في طريقه بدل ما كل واحد يروح بعربية لوحده. ده أكيد هيقلل من الغازات والعوادم اللي بتخرج من محركات العربيات وبالتالي هيقلل من التغير المناخي.
4- حاول دايمًا تشتري المنتجات صديقة البيئة والمعاد تصنيعها مثل القطن العضوي، لأن النوع ده من المنتجات بيدعم الاستدامة لأنها بتكون منتجات طبيعية مش مصنعة من البتروكيماويات.
5- ممكن تغسل مرة واحدة بس في الأسبوع عشان توفر الميه والكهربا وكمان ده هيزود من عمر الغسالة الافتراضي.
6- استخدم أكياس زبالة من الورق أو القماش، لأن الأكياس البلاستيك بتاخد وقت طويل أوي عشان تتحلل ويتعاد تصنيعها. ده غير إن التخلص منها بيؤدي إلى انبعاث غازات ملوثة.
7- لو بتشحن موبايلك وخلص شحن، شيل الشاحن على طول عشان توفر في الطاقة.
8- استخدم اللمبات الموفرة بدل اللمبات المتوهجة لأنها بتوفر في الطاقة 5 مرات عن المتوهجة، وياريت لو تطفي النور لو مش موجود أو نايم.
ممكن تفتكر إن دي طريقة حياة صعبة، بس لأ هي مش كده لو فكرت فيها كويس وتخيلت يوم ما فيهوش لا ميه ولا كهربا ولا هوا نضيف، ما فيش غير أمراض وأوبئة ونقص في كل حاجة سواء أكل أو شرب. لكن، لو عملنا الكام حاجة البسيطة دي وبدأنا بنفسنا هنعيش حياة أحسن وهنمنع التغيير المناخي.
على فكرة أنا وأختي مروة عبد الفتاح اشتركنا في مسابقة "جرين شوتس أورد 2010" برعاية مركز النشاط الإقليمي للإنتاج الأنظف. وقدمنا قصة قصيرة فيها الأفكار اللي فاتت دي كلها وهما حولوها لفيلم كارتون قصير. القصة اسمها "يوم صديق للبيئة"، وفي القصة دي بنشوف إزاي ممكن نحافظ على البيئة بعادات سليمة وبسيطة من ساعات ما نصحى ولحد ما ننام. مش بس عشان خاطر البيئة وكوكب الأرض ومواجهة التغير المناخي، لأ ده كمان العادات دي هتخلينا نعيش بصحة أفضل ونوفر في الفلوس كمان.
ليست هناك تعليقات:
إرسال تعليق